Во Македонија ништо не се сменило 100 години, а тоа колку овој филм е актуелен денес е дури непријатно. Оттука би искористил една реплика од филмот: „Ни можам да ти кажам, ниту, пак, ќе ме разбереш“, рече Попов во контекст на она што ни се случува на политички план, но алудирајќи и на жешката атмосфера што го следеше филмот пред и по премиерата
Актерите Инти Шрај и Сашко Коцев во сцена од филмот
Бурна атмосфера за филмот на Столе Попов
Одлична продукција, режисерски вешто водена приказна, богат визуелен јазик, извонредна фотографија, кадри што ви го одземаат здивот и ве тераат да се замислите дали ова е навистина македонски филм... Такви се првите впечатоци по долгоочекуваната премиера на новиот филм на Столе Попов, „До балчак“, која се одржа во неделата, во рамките на фестивалот на филмска камера „Браќа Манаки“. За историската подлошка, монтажата, кастингот - мислењата беа поделени, но вистинско разочарување е што сето ова, сите прашања за филмот, останаа во сенка на бурната атмосфера што се создаде по премиерата на филмот поттикната од нефилмски мотиви - безмалку непристојни политички провокации од анонимци на пресот, напади врз екипата за финансиските проблеми, расправии за организаторските пропусти на отворањето на фестивалот, кои беа причина Попов да го напушти црвениот килим... Заклучокот на Попов дека „До балчак“ е филм токму за тоа, за нас, за македонскиот менталитет, фино се залепи на бурната атмосфера на прес-конференцијата во неделата во Битола.
Македонски антивестерн
- Во Македонија ништо не се сменило 100 години, а тоа колку овој филм е актуелен денес е дури непријатно. Оттука би искористил една реплика од филмот: „Ни можам да ти кажам, ниту, пак, ќе ме разбереш“ - рече Попов.
Како што е познато, почетокот на овој филм датира од многу одамна, дури, како што додаде режисерот, не може точно ни да се сети кога точно се родила идејата меѓу него и сценаристот Горан Стефановски.
- Одамна имав желба да направам филм за македонските комити, но без таа нивна глорификациска претстава, туку едно мое видување на појавата на луѓе од крв и месо, со емоции, соочени со тежок живот, кои прават обид за револуција. Се работи за обичниот мал човек без митологизации и за неговото исконско чувство за слобода - вели Попов.
Во однос на жанровската припадност на „До балчак“, режисерот кажа дека е љубител на американскиот вестерн, кој обично се занимава со човековите морални дилеми на чист начин, и дека почувствувал дека во македонската историја има дел што е податлив за ваков жанр.
- Ова е вид антивестерн или македонски истерн, иако не можам да го сместам во еден жанр. Секако не е историски спектакл, бидејќи македонската кинематографија тоа не може да си го дозволи. Би кажал дека ова е пред сѐ - нов филм на Столе Попов - рече режисерот.
Сурова, но романтична љубовна приказна
Потоа тој се осврна на повеќегодишната одисеја на неуспешни обиди филмот да биде реализиран, за преговорите со големиот Бранко Лустиг да се вклучи во реализацијата, за идеите да биде снимен во холивудска продукција со ѕвезди како Орландо Блум или Скарлет Јохансон, но и за конечната одлука во него да играат главно македонски актери, а главната улога да ѝ биде доделена на Словенката Инти Шрај, од што Попов, како што кажа, е комплетно задоволен.
- Инти ми ја донесе Господ. Мартин беше Филип уште во првиот миг кога го видов, а Сашко е точно тој лик - комитата Крсто. Одлична работа завршија актерите. Да се бара од холивудски актер да јава на коњ, ќе ви побара којзнае колкаво осигурување, а нашите актери го совладаа тоа подобро од кој и да е. За тоа и за целиот нивен ангажман сум им благодарен - рече Попов.
Како што додаде, не жали што од „До балчак“ не излегол холивудски филм, бидејќи ова е филм на национална тема и во тој случај немало да излезе онака како што тој сакал.
- Филмот на премиерата оствари флуид со публиката, ми падна товарот што го носев и мислам дека го остварив својот сон. Жал ми е само што „До балчак“ е снимен 17 години по последниот мој филм „Џипси меџик“, време за кое, да бев во Сомалија, ќе снимев барем 2-3 филма - додаде тој, алудирајќи на ненаоѓањето поддршка за реализација на филмот сите овие години.
Новиот долгометражен игран филм „До балчак“ е работен во продукција на „Триангл филм“, во копродукција со „Сектор филм“, „ФХ3Х“, се снимаше во Битола, Скопје, Демир Хисар, Охрид, Штип и во Прилеп. Приказната е сместена во Македонија, мала земја во срцето на Балканот, петстотини години под турско ропство. Дејството се случува во првата декада од 20 век. Филмот е сурова, но романтична љубовна приказна во која вечната македонска кауза за сопствен идентитет и самостојност е видена од агол на строга индивидуалност, лишена од каква било идеологизација. Во филмот играат: Инти Шрај, Сашко Коцев, Мартин Јорданоски, Тони Михајловски, Сенко Велинов, Мики Манојловиќ, Никола Којо, Јовица Михајловски, Искра Ветерова, Јордан Симонов, Драган Спасов, Никола Ристановски, Гораст Цветковски, Ана Костовска и др. Апостол Трпески е директор на фотографија, Миленко Јеремиќ е сценограф, а Емилија И. Атанасовска е костимограф.
Столе Попов
Фото: Игор Бансколиев
Долговите ќе се платат од дистрибуцијата
„До балчак“ е меѓу најскапите филмови во македонската кинематографија, чиј буџет изнесува 3,6 милиони евра, од кои 2,5 милиони евра му одобри Владата како филм од национален интерес, а Филмскиот фонд му даде максимална сума од 500 илјади евра.
Поради големите долгови на продукцијата „Триангл“, која го започна снимањето на филмот, Филмскиот фонд на Македонија, преименуван во Агенција за филм, го презеде и ќе се грижи за неговата дистрибуција и промоција. Парите собрани од натамошниот пат на филмот ќе бидат префрлени на блокираната сметка на продукциската куќа за исплата на долговите.
- Агенцијата не плаќа долгови, но филмот сам ќе си ги исплати од дистрибуцијата. Ова е единствениот легален начин да се средат овие проблеми - рече Дарко Башески, директор на Агенцијата за филм.
Според Попов, реализацијата на филмот чинела многу, но ако „До балчак“ се правел некаде надвор, би чинел најмалку пет пати повеќе.
Автор: Весна Дамчевска / Оваа е-адреса е заштитена од спамботови. Треба да ви е овозможено JavaScript за да ја видите.
Извор: Нова Македонија