Периодот од јуни до јули 2026 година претставува едно од најзначајните и најдинамичните поглавја во работата на Здружението на музички педагози „Полихимниа“ – Скопје. Во рамките на Erasmus+ програмата беа реализирани бројни активности кои ги обединија музичкото образование, европската соработка, професионалното усовршување и уметничката размена, создавајќи простор за нови искуства, знаења и трајни партнерства.

Преку внимателно осмислена програма, ЗМП „Полихимниа“ успеа да воспостави плодна соработка со високообразовни институции, музички училишта и истакнати европски музички педагози, овозможувајќи им на учениците и професорите непосреден контакт со современите тенденции во музичката педагогија и интерпретација.

Во рамките на своите активности за континуирано професионално усовршување и јакнење на европската димензија во образованието, Здружението на музички педагози „Полихимниа“ активно учествуваше и на меѓународната Erasmus+ обука „My Eco-School and Sustainable Development“ во Будимпешта, преку своите претставници Николина Ефтимова-Тодоровска и Јана Тодоровска.

Оваа специјализирана обука беше посветена на современите пристапи во еколошкото образование, управувањето со животната средина и принципите на одржливиот развој во воспитно-образовниот процес. Во текот на едукацијата беа обработени актуелните еколошки предизвици со кои се соочуваат современото општество и локалните заедници, како и нивното влијание врз квалитетот на животот, образованието и идните генерации.

Особен акцент беше ставен на стекнувањето практични знаења и современи методологии за интегрирање на принципите на одржливиот развој во наставниот процес, развивањето еколошка свест кај учениците, како и создавањето безбедна, здрава и одржлива училишна средина во согласност со европските образовни стандарди.

Присуството на Николина Ефтимова-Тодоровска и Јана Тодоровска на оваа Erasmus+ обука претставува уште една потврда за заложбите на ЗМП „Полихимниа“ за постојано стручно усовршување, следење на современите европски образовни трендови и пренесување на новостекнатите знаења, вештини и добри практики во македонскиот воспитно-образовен систем.

Со ваквите меѓународни едукативни активности, Здружението не само што ги зајакнува компетенциите на своите членови, туку активно придонесува кон развојот на современо, инклузивно и одржливо образование, во кое музичката педагогија, културата и еколошката одговорност се препознаваат како меѓусебно поврзани вредности на европското образование.

Особено значаен настан беше гостувањето на истакнатата српска пијанистка и педагог проф. Ана Ковачевиќ, која одржа циклус предавања и практични презентации на Музичката академија при Универзитетот „Гоце Делчев“ во Штип, во Државното музичко училиште во Битола и во ДМБУЦ „Илија Николовски – Луј“ во Скопје.

Нејзиното предавање, „Телесните движења и организацијата на временската структура на делото како обединувачки фактор во изведбата“, претставуваше значаен придонес кон современото музичко образование. Преку поврзување на движењето, природната телесна координација, дишењето, ритмичката организација и музичката мисла, учесниците добија нови сознанија за тоа како техничката сигурност и уметничката слобода се градат преку природно и свесно музицирање.

Покрај теоретските предавања, учениците активно работеа на своите композиции, добивајќи индивидуални насоки за интерпретацијата, развојот на музичкиот израз и сценската комуникација. Оваа непосредна работа претставуваше исклучително драгоцено искуство и силен поттик за нивниот понатамошен уметнички развој.

Во истиот период, проф. Верица Шотаровска и проф. Емилија Маринова успешно ја реализираа и Erasmus+ Job Shadowing мобилност, насочена кон изучување на современи методологии во музичката педагогија. Програмата опфати истражување на техники за природно движење, телесна релаксација, организација на музичката мисла, импулсот, ритамот, музичкиот јазик и психофизичката подготовка на изведувачот.

Посебно внимание беше посветено на принципите на Валдорфската педагогија, како и на Еуритмијата – специфична уметност на движењето развиена од Рудолф Штајнер, која преку синтеза на музика, говор и движење претставува значајна алатка за развој на музичката чувствителност, концентрацијата и уметничкиот израз.

Во насока на поддршка на младите таленти, ЗМП „Полихимниа“ организираше и селекција на кандидати за Erasmus+ мобилност за ученици – учество на музички натпревари, при што беше избран претставник за 30. Меѓународен натпревар „Euritmia“ во Поволето – Удине, Италија.

Македонското музичко образование беше достоинствено претставено преку ученикот Стефан Трајаноски - саксофон, кој освои второ место со 99 поени, еден од највисоките резултати на натпреварот. Како признание за извонредниот успех, тој настапи и на свечениот концерт на најуспешните учесници, претставувајќи ја Македонија на меѓународната сцена.

Паралелно со овие активности беше организирана и национална аудиција за избор на ученици кои ќе учествуваат на краткорочната Erasmus+ мобилност во Макарска, Република Хрватска. Големиот интерес и високото ниво на изведбите уште еднаш покажаа дека младите македонски музичари располагаат со исклучителен потенцијал и силна мотивација за европска соработка.

Следуваше реализацијата на Short-stay Mobility for Learners, која претставуваше вистинска платформа за учење, културна размена и меѓународно поврзување. Во текот на престојот учениците учествуваа на индивидуални часови, работилници, концерти и заеднички музички проекти.

Особено значајни беа часовите со проф. Ана Пехар (флејта), проф. Хана Влахо (пијано) и проф. Ана Рунтиќ (виолина), кои преку современи педагошки пристапи им овозможија на учениците нов поглед кон техниката, интерпретацијата и уметничката комуникација.

Во рамките на мобилноста беше реализирана и концертна активност во Културниот центар „Павароти“ во Мостар**, каде младите музичари уште еднаш покажаа дека музиката претставува универзален јазик кој ги поврзува луѓето, културите и образовните системи.

Кулминација на проектните активности беше концертот „Together – Заедно – Zajedno“, кој ги обедини музичките училишта од Македонија, Хрватска и Босна и Херцеговина во заедничка прослава на европската културна соработка.

Во овие активности организирани од ЗМП Полихимниа учествуваа инструменталисти – ученици од ДМБУЦ „Илија Николовски – Луј“ – Скопје, Државното музичко училиште – Битола, ДМУ „Тодор Скаловски-Тетоец“ – Струга, Музичката академија при Универзитетот „Гоце Делчев“ – Штип, како и партнерските институции од Макарска, Мостар и Љубушки.

Особен придонес во реализацијата на програмата дадоа професорите Светлана Богданоска Ристоски, Маријана Влаисављевиќ, Александар Стефановски, Билјана Димовска, Никола Јованов, Златка Митева, Маре Видевска, Александра Кочевска, Томислав Костовски и Николина Ефтимова Тодоровска, чија посветеност, професионалност и педагошка работа овозможи

а учениците успешно да ја претстават македонската музичка школа.

Резултатите од овој исклучително богат циклус активности јасно покажуваат дека Erasmus+ претставува многу повеќе од програма за мобилност. Таа создава простор за професионален раст, размена на знаења, културен дијалог и градење европски партнерства кои трајно го збогатуваат музичкото образование.

Преку својата визија, организациски капацитет и меѓународна активност, ЗМП „Полихимниа“ успешно се позиционира како една од водечките организации во областа на музичката педагогија и европската образовна соработка. Со секој реализиран проект се отвораат нови можности за младите музичари, се поттикнува нивната креативност и се создаваат услови за градење генерации уметници кои ќе бидат достојни амбасадори на македонската музичка култура во Европа.

Изминатиот период не беше само низа успешно реализирани активности, туку јасен показател дека со визија, посветеност и партнерство може да се создадат трајни вредности кои ќе остават силен белег врз развојот на музичкото образование, културата и европската соработка.

Редакција на Премин Портал

24.07.2026