ТРОПАРИ НА СВЕТИТЕЛИТЕ И ПРАЗНИЦИТЕ
Тропар на светиот преподобен
отец Јован Рилски
18 август / 31 август
Втемелен на покајание, излив на умиление,
пример на утешение и на духовно совршенство
беше твојот рамноангелен живот, преподобен.
Оче Јоване, кој во молитви и пост и солзи пребиваше,
моли Го Христа Бога за нашите души.
Тропар на светите
Христови маченици
Иларион, Дионисиј и Ермип
18 август / 31 август
Добар пример пред себе имајќи во верата
по Бога, ревносен молитвеник во лицето
на Емилијан свети, го отфрливте стравот
од минливоста и поитавте венец маченички да добиете, Иларионе, Дионисие и Ермипе.
Застапете се сега свети маченици
за сите кои го чествуваат вашиот спомен
и Господа Го прославуваат.
Извор МПЦ – ОА
Манастир свети Јован Претеча Слепче
Тропар на преподобниот отец
Арсениј Пароски
18 август / 31 август
Блажен си ти старче Арсение оче наш преподобен,
покајниче и сведоку на светлината Господова,
кој нам молитвено ни ја приближи
благодатта која се излива на оние кои
Го љубат Бога и ближниот.
Застапи се за нас горостасу меѓу преподобните
и моли се да имаме покајание кое води кон спасение.
Извор МПЦ – ОА
Манастир свети Јован Претеча Слепче
Тропар на светиот
Христов новомаченик
Димитриј
од Самарина во Епир
18 август / 31 август
Новомачениче Христов, Димитрие свети,
денес чест и пофалба воздаваме,
на твоето свето за верата страдање,
и Господа Го молиме по молитвите твои свети,
да даде опростување на прегрешенијата наши,
зашто Он благодатно те закрепна во подвигот твој
и со камења како тебе ја соѕида Црквата своја.
Извор МПЦ – ОА
Манастир свети Јован Претеча Слепче
Тропар на светите
Христови маченици
Ермо, Серапион и Полиен
18 август / 31 август
О, Господи, Црквата се постави на каменот
од Твоите повелби и Ермо, Серапион и Полиен
ги вгради во темелот на нејзините основи,
кои маченички венец добивајќи
станаа семе за идните христијани.
Нека по нивните свети молитви, патот иако каменит,
да биде прооден за нашите души.
Извор МПЦ – ОА
Манастир свети Јован Претеча Слепче
Тропар на светиот
свештеномаченик Христов
Емилијан
18 август / 31 август
Ја спозна силата Господова во слабоста,
Го виде Оној Кој го чува Израилот,
о, Емилијане свет мачениче,
и се зарадува душата твоја на спасението одозгора,
затоа пред светот смело исповеда
дека Христос е единствениот вистински Бог.
Радувај се и за нас моли се достојнославен
жителу на Небесното Царство.
Извор МПЦ – ОА
Манастир свети Јован Претеча Слепче
Тропар на светите тристотини
Христови маченици
18 август / 31 август
Бродот огнен кој вас ве поведе свети маченици,
за кормилар Го имаше Христа Спасителот,
испратени бевте од Флор и Лавр светите,
а дочекани во Царството Небесно од Богомајката
и сите во Христа Светии.
Молете се за нас страдалници кои
низ оган и вера ја избеливте душата ваша.
Извор МПЦ – ОА
Манастир свети Јован Претеча Слепче
Тропар на светите
маченици Христови
Флор и Лавр
18 август / 31 август
Времето земно ваше протече исполнувајќи ги
светите Христови заповеди,
душата за Христа се обручи и мноштво
овци загубени кон Него приведовте,
о, Флоре и Лавре, кои молитвено нас
кон Аголниот камен нѐ приближивте.
Радувајте се свети маченици и застапете се за нас,
пред Оној Кој гревови простува.
Извор МПЦ – ОА
Манастир свети Јован Претеча Слепче
Тропар на светите
илјада Христови маченици
18 август / 31 август
Велик е нашиот Бог, велик е Христијанскиот
Спасител и нема други богови освен него:
одекнуваше од грлата ваши о, свети маченици,
кои бодрени од благодатта Христова
поитавте маченички низ тесната врата кон вечноста,
каде сега насладувајќи се на ветеното со еден глас и една уста
молете се, за оние кои во Христа поверуваа.
Извор МПЦ – ОА
Манастир свети Јован Претеча Слепче
Од Верскиот календар на МПЦ (31.08.2023)
ТРОПАР
Тропар (грч. τροπάριον, цсл. тропа́рь) е кратка црковна молитвена песна, настаната во доцниот стадиум на химнографијата. Тропарот ја содржи суштината на празникот за кој е напишан и во кој се прославува светителот; во Канонот, тропарот следи после ирмосот. Често се однесува и на апокалиптик (грч. απολυτίκιον), или отпустителна химна преку која се опишува главната тема на богослужењето на денот, а со која се завршува Вечерната богослужба.
Богородичен (теотокион) е посебен вид на тропар, кој е посветен на Пресвета Богородица. Помали варијации во Богородичниот водат кон Крстобогородичен (ставротеотокион), посебен вид на тропар посветен на страдањето на Пресвета при распнувањето на Христос на Крстот, и како таков најчесто се користи во среда и петок, денови кога Црквата се сеќава на чесниот Крст Господов.
Понекогаш тропарот се користи како рефрен помеѓу читање на стихирите.од Псалмите, иако примарната функција во тој случај ја имаат стихирите.
Тропарник се нарекува една засебна целина во книга со тропари и кондаци, за секој ден на Црковната литургиска година.
ПреминПортал
2023 лето Господово
Од Верскиот календар:
Преподобен Јован Рилски
Овој голем подвижник и светилник на Православната Црква се роди близу Софија во местото Скрина, во времето на царот Борис. Се роди од бедни и благочестиви родители. По смртта на родителите се замонаши и се оддалечи во една дива гора и таму во една пештера почна да се подвизува. Овде претрпе многу напади од демоните и од луѓето, од разбојници и од своите роднини. Потоа се пресели на Рилската Планина и се насели во едно шуливо дрво. Се хранеше само со трева и со грав, којшто по Божја Промисла почна да расте во близината. Долги години тој не виде човечко лице, додека, повторно по Божја Промисла, не го открија овчари коишто трагаа по своите изгубени овци. Така светителот се прочу меѓу луѓето и тие почнаа да му доаѓаат барајќи помош во болестите и во маките. Го посетуваше и самиот цар бугарски Петар и бараше совети од него. Мнозина ревнители во духовниот живот се населија близу Јован и таму наскоро кренаа храм и манастир. Свети Јован се упокои во Господ мирно на 18 август 946 година, во седумдесеттата година од неговиот живот. По смртта им се јави на своите ученици. Неговите мошти се пренесени најнапред во Софија, па во Унгарија, па во Трново и најпосле во Рилскиот манастир, каде што и денес почиваат. Рилскиот манастир со векови беше светилник и место на чудотворна сила и духовна утеха за христијанскиот народ во Бугарија, особено во тешките времиња на турското ропство.
