ПСАЛМ 68
Слугата Господов е во голема неволја
1 Спаси ме, Боже, зашто водите стигнаа до гушата моја!
2 Потонав во длабока тиња, каде што нема дно; влегов во морска длабочина и бура ме потопи.
3 Изнемоштев од викање; засипна грлото мое; попуштија очите мои, чекајќи Го мојот Бог.
4 Оние, што ме мразат без причина, се намножија повеќе од косата на главата моја: непријателите мои, кои ме гонат неправедно, се засилија; она што не сум го зел, бараат да го вратам!
5 Боже, Ти го знаеш моето безумие, и гревовите мои не се сокриени од Тебе.
6 Да не се посрамат поради мене сите оние, што се надеваат на Тебе, Господи, Боже на силите. Да не се посрамат поради мене оние, кои Те бараат, Боже Израилев,
7 зашто заради Тебе поднесувам исмејување, и срам го обзеде лицето мое.
8 Туѓ станав за браќата свои, туѓинец за синовите на мајка ми моја.
9 Бидејќи ревноста за Твојот дом ме изеде, и навредите на оние што Те хулат, паѓаат врз мене;
10 и постам со душата своја, но и тоа ми го земаат за зло.
11 Место облека облекувам вреќа; и со тоа им станав за приказ;
12 против мене зборуваат оние што седат пред портите и пијаниците пеат за мене.
13 Јас, пак, молитвата моја ја упатувам кон Тебе, Господи; во благопријатно време, Боже, со големата Своја милост услиши ме заради вистината на спасението од Тебе;
14 изведи ме од калта за да не потонам; да се избавам од оние, кои ме мразат, а и од длабоките води;
15 за да не ме потопи водниот вртеж, и длабината да не ме проголта, да не ја затвори над мене бездната својата уста.
16 Услиши ме, Господи, зашто блага е Твојата милост; поради големата Твоја милосрдност погледај ме;
17 не одвраќај го лицето Свое од слугата Твој, зашто сум потиштен; услиши ме брзо;
18 наклони се кон душата моја и искупи ја; поради моите непријатели, спаси ме.
19 зашто Ти го знаеш мојот подбив, мојот срам и моето засрамување: познати Ти се сите мои непријатели.
20 Навредите ми го скршија срцето; очаен сум, очекувајќи некој да ми се сожали, но го немаше, и да ме утеши некој, но не го најдов.
21 И ми дадоа жолчка да јадам и кога зажеднев - со оцет ме напоија.
22 Трпезата нивна нека им биде примка, гоштевањето - стапица;
23 да им се помрачат очите, та да не гледаат, и бедрата нивни ослаби ги засекогаш;
24 излиј го врз нив гневот Свој, и јароста на Твојот гнев нека ги обземе;
25 домовите да им ги запустиш, и во шаторите нивни да не остане никој жив;
26 зашто оној кого Ти го порази, тие го гонат, и со тоа ги умножија болките од раните мои.
27 Притури вина врз вината нивна, за да не добијат прошка од Тебе.
28 Нека бидат избришани од книгата на живите и да не бидат запишани меѓу праведните.
29 Јас, пак, сум беден и страдам; нека дојде од Тебе, Боже, спасението за мене!
30 Ќе го славам името на мојот Бог со песна, ќе го возвеличувам во благодарност,
31 и тоа ќе Му биде поугодно на Господ, отколку теле или јунец со рогови и со копита.
32 Нека го видат тоа оние што страдаат и нека се зарадуваат. Нека ви живнат срцата вам, кои Го барате Бога,
33 зашто Господ ги слуша сиромасите и не ги презира затворениците Свои.
34 Нека Го слават небесата и земјата, морето и сé што живее во него;
35 зашто Бог ќе го спаси Сион, ќе се изградат градови во Јудеја, и таму ќе ги наследат;
36 и ќе се веселат таму оние што го сакаат името Негово.
„Ќе му пеам на Господа се додека постојам. “
Од преполнетото срце на Давида и другите псалмописци, се изли копнежот на секое срце човечко да заедничари со Бога да испроси од Бога прошка за согрешенијата, изливајќи го низ благопријатната песна своето покајание пред престолот Божји и од Сесилниот Господ да побара заштита од злото кое постојано го притиска.
Секоја Богобојажлива душа колку повеќе ги чита светите псалми се повеќе во неа се буди радоста која произлегува од посетата на Божјата благодат и се влева во неа мир и сигурност од закрилата на цврстата закрила Божја.
Господ наш Исус Христос ги посочува и како пророштва за она што стана со Него а заради нашето спасение /лк.24.44/.Светите Апостоли пак ги препорачуваат на верните за усовршување во верата/Еф.5.19/. Великите отци наши /св.Атанасиј Велики , св.Григориј Ниски , св. Јован Златоуст .../со голема радост говорат за нивната душеполезност во своите беседи и одговори на верниците за поуките од псалмите, препорачуваќи ги на верните што повеќе да ги читаат. Светата Црква поделуваќи ги во таканаречени катизми ги распоредила во богослужбениот неделен циклус со цел да се прочита целиот псалтир за една седмица, а за време на Великиот пост и два пати. За жал денес катизмите честпати се прескокнуваат на богослужбите од причини да се постигне во време и другите обврски да можат да се завршат, а ако се земе во обзир и тоа што во многу храмови не се служзи секојдневно/ да не бидам погрешно сватен ова најчесто се случува од практична па и финансиска невозможност/за да не се маргинизира псалтирот и верните да не се исклучат од големите дарови кои произлегуваат од неговото читање се препорачува на верните покрај молитвеното правило во своите молитви да го практикуваат и читањето на псалмите со голема богобојазливост за да нацрпат од овој благодатен извор многу дарови за своја душевна полза - за мир, утешение, здравје и спасение .Амин!
о. Горан Тасески
ПСАЛМИ
Вовед
Псалмите се најдолгата книга во Светото Писмо. Тие се песни кои се пееле со музичка придружба, или, пак, се рецитирале како молитви. Значителен број псалми се напишани од Давид, но има и од други писатели, како што се Асаф, Мојсеј, Соломон и потомците на Кора. Овие песни биле собирани подолго време и заземале важно место во богослужбите на израилскиот народ.
Името Псалми потекнува од насловот на оваа збирка песни во грчкиот превод на Стариот завет.
Сто и шеснаесет псалми содржат пред-текст кој дава податоци за потеклото, видот и музичката придружба на соодветниот псалм. Можат да се издвојат повеќе видови псалми, меѓу кои:
1. Химни, или славословија кои Го слават Господа. Такви псалми се: 8, 9, 32, 99, 102-104, 110, 112, 113, 116, 134, 135, 144-149.
2. Псалми во кои Господ е прикажан како Цар: 46, 92, 95-98.
3. Псалми за владетелите: 2, 17, 19, 20, 44, 71, 88, 100, 109, 143.
4. Сионски песни: 45, 47, 75, 86, 131.
5. Псалми за верата во Бога: 1, 36, 48, 72, 77, 111, 118, 126, 132.
6. Псалми испеани во неволји: 11, 43, 57, 59, 73, 78, 79, 82, 84, 89, 93, 105, 107, 122, 125, 136
7. Молитви упатени кон Бога, поради несреќи: 5-7, 12, 16, 21, 24, 25, 27, 30, 34, 37, 38, 40-42, 50, 53, 56, 58, 60, 62, 63, 68–70, 85, 87, 101, 108, 119, 129, 139-142.
8. Благодарствени псалми: 9-10, 29, 31, 33, 39, 91, 106, 115, 117.
Инаку и Исус пеел некои псалми, заедно со Неговите ученици (види Мр. 14,26).
Псалмите се цитирани повеќе од сто пати во новозаветните книги. Некои псалми содржат прототипови за Личноста на Исус Христос. На пример, псалмите 21 и 68 ги претскажуваат Христовите страдања, додека псалмите 15, 109 и 117 содржат елементи на Христовото воскресение и слава. Псалми во суштина се состои од пет книги и тоа: 1. Пс. 1-40, 2. Пс. 41-71, 3. Пс. 72-88, 4. Пс. 89-105 и 5. Пс. 106-151.
Извор: БИБЛИЈА
Друго:
