“И така, возљубени, имајќи вакви ветувања, да се очистиме од секаква скверност на телото и на духот, па да твориме дела свети и со страв Божји”2.Кор.7.1. Со какви дела живееме во овој свет, со такви ќе застанеме пред нашиот Христос. Силни беа светителите и со духот и со телото. И нашиот светилник и темелник на нашата црква и народ, светиот Климент, охридскиот чудотворец беше силен со молитвата.Со ревност го учеше народот и им го објаснуваше словото на нашиот народ, учејќи го во што да веруваат, како да се крстат, како да се молат, да ревнуваат кон Христа... И светиот Наум чудотворец беше овде. Тихуваше на другиот крај на езерото во манастирот посветен на Светите Архангели. Целосно му се посвети на небесниот Отец и стана силен темел на монасите до денес.Жарот не беше изгаснат, туку беше разгорен и како семе се посеа на нас, кој што сега расте и се уште ќе се размножува. Манастирите како големо духовно огниште т.е. монасите секојдневно Му принесуваа служба на Бога изговарајќи ја, оној кој што служи, молитвата “Ти благодариме и за оваа служба која што си благоволил да ја примиш од нашите раце, иако пред тебе стојат ...”

 Чукаат камбаните во недела и го повикуваат народот на Божествена Литургија. Од Плаошник до свети Наум, Од Лесново до Бигорскиот манастир. Од Лешок до манастирот Преображение – Зрзе. Од Вељуса до Хамзали... чукаат и го повикуваат народот и означувајќи го почетокот на светата Литургија. Се принесува Телото и Крвта на нашиот Спасител, Господ Исус Христос за простување на гревовите и за вечен живот. На светиот престол стои свештеникот и се моли за нас, принесувајќи ја бескрвната жртва на возљубениот наш Отец небесен.
 Моштите на свети Климент почиваат на местото каде што самиот тој го одреди и го ископа својот гроб. И светиот Наум почива во својот манастир и се моли за нас пред престолот на Света Троица.

 Бог ни даде радост да се радуваме. Ни ги остави примерите од светиите, па и нивните мошти. Ни остави манастири со монаси кои што постојано се молат за нас и го негуваат тоа топло жариште. Го имаме Христос, мајката Божја, светителите, ја имаме Црквата Света, соборна и апостолска. Од неа подалеку сме како овци надвор од трлото, па доаѓа волкот и..... Црквата плови кон спасението, носена од брановите на морето(непријателите на неа). Се што е дадено од Бога е вечно и благословено. Секој дар доаѓа од Него, Отецот на светлината и на секоја добрина.

 Помилуј ме, Боже, поради големата Твоја милост, и заради големата Твоја добрина избриши ги безаконијата мои Псал.50.1.

Да, Господи, помилуј ме!

Подготви: Стојанче Андов

{moshits}