Скопје, 11 мај 2013 (МИА) - Со усвојување Декларација вечерва во Скопје заврши Третата светска конференција за меѓурелигиски и меѓуцивилизациски дијалог, која годинава беше посветена на темата „Слободата и достоинството-основни вредности во меѓучовечките, меѓурелигиските и меѓукултурните односи“.
Во обраќањето пред присутните претседателот на државата Ѓорге Иванов истакна дека во изминатите шест години Република Македонија организирајќи ги трите светски конференции покажа дека на заедничка маса може да ги донесе различните религии.
- Како што од мислата произлегува делото, така и од овој дијалог очекувам да произлезат конкретни дела за доброто на нашите деца. Но, соработката исто како и дијалгот нема да дојде сама од себе. Ни претстои уште многу работа, рече Иванов.
Тој подвлече дека Македонија има многувековна традиција на соживот и религиска толеранција и е една од ретките европски земји каде православните христијани и муслимани го слават Бога под ист покрив. Тоа, вели, се места каде религиите не само што се допираат туку и просторно и временски се преклопуваат, рече шефот на државата.
Имајќи го превид фактот за длабоката традиција на толеранција, посочи и оти не се чувствува пријатно што претставниците на ИВЗ првпат не учествуваат на оваа конференција и порача оти е потребно да се комуницира затоа што „тој што комуницира се интегрира“.
Министерката за култура Елизабета Канческа-Милевска изрази задоволство што во текот на третата конференција беа разгледани духовни, социјални, религиски и културни прашања што го оптоваруваат светот денес.
- Светот веќе подолго време се соочува со т.н. рецесиска, економска криза. Но, нас не интересираше колку и како таа се одразува на духовната и културната состојба на човештвото, хуманизмот и темелните вредности на современата цивилизација. Второто клучно прашање што се наметна беше дали сите ние што припаѓаме на различни религиски, културни, етнички, политички ентитети можеме да приодонесеме со нешто таа криза да се надвладее барем на духовен план и низ дијалог и разбирање, да доведе до една хармонична насока на дејствување? Одговорот имам впечаток на оваа конференција беше поволен и позитивен. Да направиме нешто сите заедно во таа насока, рече Канческа-Милевска.
Таа изрази задоволство што Декларацијата од Втората конференција за меѓурелигиски и меѓуцивилизациски дијалог одржана во Охрид 2010 година, за која биле исвестени сите позначајни меѓународни организации, имала многу позитивен прием. Воедно искажа уверување дека и Декларацијата од тертиот форум ќе придонесе во насока на промовирање на меѓуверскиот и меѓукултурниот дијалог, кој гради разбирање, добра волја, и односи меѓу религиите, културите и верите и поттикнува мир и безбедност.
Инаку, со декларацијата учесниците упатија апел за зголемена интеракција и партнертво меѓу владите и верските заедниците во решавање на насилството и сите форми на терор, како и посветена работа за мир, развој и човечко достоинство. Се посочува дека почитувањето на заедничкото наследство, културната разновидност и достоиснтвото на секој поединец се темелни вредности на меѓукултурниот дијалог кои ни овозможуваат да ги спречиме етничките, верските и културните поделби. Воедно се изразува натамошна посветеност на промовирањето на меѓуверскиот и меѓукултурниот дијалог.
- Веруваме дека образованието може да игра значајна улога во промовирањето на меѓуверското разбирање и соработка за мирно решавање на меѓуверските конфликти и ќе го промовираме образованието во сите негови аспекти. Човековото достоинство на секој поединец е во основата на општество и на секоја религија и култура. Нашите културни и верски вредности се базираат врз принципите на достоинство, еднаквост и почит кон сите поединци. Овие вредности треба да се прошират во сите сфери на животот, стои во Декларацијата.
На Третата светска верска конференција присуствуваа над 250 странски и домашни гости од сите континенти, верски претставници и професори-теолози. Со конференцијата беа одбележани три јубилеи: 1700 години од Миланскиот едикт - добивање слобода на христијанството; 70 години од холокаустот на Евреите и 10 години од Самитот на шефови на држави од Југоисточна Европа „Дијалог меѓу цивилизациите“ во рамките на УНЕСКО и Охридската порака за мир, инициран од покојниот претседател Борис Трајковски во 2003 година. ва/21:00
