Скопје, 12 март (МИА) - Над два милиона дрвца или онолку колку што има жители Република Македонија денеска беа засадени во рамки на големата граѓанска акција „Ден на дрвото-засади ја својата иднина“.
Се садеше на 63 локации во 30-тина општини ширум Републиката, а беа опфатени 1.031 хектари. Се садеа дрвца на оние места кои летото беа опожарени од големите шумски пожари.
Претседателот на Владата на Република Македонија Никола Груевски денеска во рамки на акцијата засади дрвце во Миладиновци, скопско.
- Два милиона садници да се засадат во еден ден е навистина нешто што досега не се случило. Импресивно е она што го гледаме денеска на сите локации во Македонија, излезот на граѓаните е над сите очекувања. Ваквиот одѕив ќе делува на севкупната општествена свест на државата за националното богатство на Македонија, вклучувајќи ги и шумите, изјави премиерот Груевски по засадувањето на дрвцето.
Според него, најважно е што има капацитет и свест кај луѓето кои, како што рече, сакаат да придонесат и знаат да проценат што е вредно.
Тој потсети дека Владата за 2007 и 2008 година планираше да се засадат вкупно 10 милиони садници од кои само два милиона денеска, со масовно учество на граѓаните.
- Масовното учество помага од многу страни, прво - заштедува средства, второ - ја зголемува свеста кај секој граѓанин дека пожарите настануваат од човечки фактор во најголем дел, од небрежност, од невнимание. Тој што излегол да засади дрво многу тешко е утре да запали затоа што знае како изгледа садење дрво, колку бавно расте, каква корист има од него. Свеста е многу поголема димензија отколку засадувањето, рече Груевски.
Акцијата „Ден на дрвото-засади ја својата иднина“ за македонскиот премиер е акција за иднината и истовремено апел во иднина луѓето повнимателно да се однесуваат кон она што е наше заедничко, она што е национално богатство на Македонија. - Ова што денеска го садиме можеби не е толку за нас колку за нашите внуци, истакна Груевски.
Во Миладиновци, заедно со премиерот Груевски, дрвце засади и министерката за внатрешни работи Гордана Јанкулоска. Во акцијата активно се вклучени и останатите членови на македонската Влада кои засадуваат дрвца на различни локации ширум Републиката.
Министерот за здравство Имер Селмани засади дрвце на локацијата Горна Матка. - Среќен сум како граѓанин на Република Македонија што има ваков голем одѕив на оваа акција, за да инвестираме во нашата иднина и да го санираме она што ни се случи минатата година со пожарите, изјави Селмани.
Тој рече дека очекува вакви акции да се организираат и во текот на целата година и да станат традиција за нашите поколенија.
Припадници на регионалните центри на Секторот за гранични работи при Министерството за внатрешни работи, во знак на добрососедство, на четири гранични премини, во заедничка акција со граничните полиции на Србија, Бугарија и Албанија, засадија садници, како поддршка на акцијата „Ден на дрвото – Засади ја својата иднина“.
Во денешната најмасовна акција за пошумување на Република Македонија активно се вклучија и околу две илјади припадници на Армијата на Република Македонија. Во Миладиновци беа околу 500 припадници на АРМ кои на посебна локација ќе засадат млади дрвца. Секој војник ќе засади по 60 садници.
Претседателот на Собранието на Република Македонија Љубиша Георгиевски денеска во спомен на депортираните македонски Евреи свечено го отвори објектот ХАНА, каде во присуство на претставници на верските заедници, на архиепископот охридски и македонски г.г. Стефан и на дипломатскиот кор, меѓу кои и амбасадорот на Израел во Република Македонија Армира Арнон, засади дрво пред објектот, со што се вклучи во акцијата.
- Среќен сум што учествувам во ова национално собитие. Тоа е прекрасна акција и би било голема штета ако не стане традиција во нашата држава, изјави собранискиот спикер.
Претставниците на Зелената парламентарна лоби група денеска во Горна Матка засадија дрвца, порачувајќи „Денот на дрвото“ да не биде акција само за еден ден - 12 март, туку 365 дена во годината.
Членот на оваа парламентарна група, пратеникот Маријан Додовски истакна дека ова е многу значаен ден за Македонија, ден кој треба Република Македонија да ја стави во групата на држави кои се грижат за животната средина, за своето потомство и за глобалните климатски промени. На денешниот ден Македонија во пракса покажа дека ја поддржува поговорката „Мисли глобално, делувај локално“.
- Денеска ќе испратиме силна порака до целиот свет дека Република Македонија, иако е мала земја по површина, сепак, е горда и знае да прави големи дела, рече Додовски.
Пратеничката Лилјана Поповска истакна дека парламентарците засадуваат дрвца за нашата иднина, без разлика на кои партии припаѓаат и на која религија.
На локалитетот Горна Матка дрвца засадија и претставници на дипломатскиот кор. - Ова е почеток на нова ера за пошумување на опожарените области. Оваа акција ќе цути, ќе расте заедно со дрвата што денеска ги засадивме, изјави амбасадорот на Република Полска во Република Македонија Карол Бахура, кој засади дрвце со што се вклучи во акцијата.
Тој рече дека Полска беше шокирана од пожарите што минатата година ја зафатија Македонија и дека неговата земја тогаш испрати опрема за да се справиме со огнените стихии.
Хрватскиот амбасадор Иво Кујунџиќ по засадувањето на дрвцето истакна дека оваа акција е многу корисна и потребна и оти имаат намера да ја спроведат и во Хрватска.
На Матка дрвце засадија и поглаварот на Македонската православна црква г.г. Стефан, претставници од Еврејската зедница во Македонија, од Исламската верска заедница и од Космофон.
Акцијата во која се вклучени 9.000 стручни лица, во 30-тина градови, е граѓанска иницијатива за пошумување во Република Македонија. Акцијата се реализира во соработка и со поддршка од Владата на Република Македонија, НВО, ЗЕЛС, екстрадни уметници, бизнисмени и медиуми.
Денешниот ден Владата на Република Македонија го прогласи за неработен. дма/паг/16:06
Посети:{moshits}
