САС НА МПЦ ВО ПРЕСРЕТ НА 40 ГОДИНИ АВТОКЕФАЛНОСТ
На 21. 06. 2007 година, во просториите на Македонската архиепископија во Скопје, заседаваше Светиот Архиерејски Синод на Македонската Православна Црква.
Полошко-кумановскиот Митрополит, г.Кирил е единствениот Архиереј на возобновената Македонска православна црква, што оваа година ќе го добие највисокото црковно признание, орденот на Св.Климент Охридски од прв ред.
.
. 
Синодот на МПЦ, одлучил на 40-годишнината од автокефалноста да одликува неколкумина заслужни граѓани од општествениот живот, но нивните имиња ќе бидат соопштени на 14 јули, кога во Охрид ќе се одбележува четиридецениската автокефалност.
Како што соопшти портпаролот на САС на МПЦ, г.Тимотеј во групата одликувани нема ниту еден политичар од поновата македонска историја. Но затоа благодарност ќе им биде искажана на неколку бизнисмени, академици и луѓе кои придонеле за возобновувањето на Македонската Православна Црква.
Иако е прв Архиепископ на возобновената Македонска православна црква, покојниот Поглавар, г.г. Доситеј нема да добие одликување. Образложението на МПЦ е дека црквата не практикувала постхумно доделување на одликувања.
Инаку МПЦ за 40-годишнината од автокефалноста подготвува и неколку капитални црковни изданија кои ќе бидат промовирани.
Мирно лето
Продолжувањето на преговорите со Српската православна црква и црковната дипломатија и по вчерашната синодска седница остануваат статус кво. Македонските владици за овие теми не разговарале, затоа што велат дека се уште не добиле никакво писмено известување, ниту од СПЦ, ниту пак од Грчката православна црква. Засега е неизвесно и патувањето во Атина, бидејќи иако Грчкиот синод одлучи да прими македонска делегација, се уште за тоа писмено не ја исвестил МПЦ.
Марјан Николовски
