20 февруари 2011 год.- На празникот на свети Партениј, епископ Лампсакиски; Преподобен Лука Еладски
Свето Евангелие од светиот апостол Марко (зач. 68)
Во она време го фатија војниците Исуса, Го одведоа да Го распнат на местото Голгота, што значи: место на черепи. Беше третиот час, и Го распнаа. А во шестиот час настана темнина по целата земја, до деветтиот час. И во деветтиот час Исус извика гласно, велејќи: „Елои, Елои, Лама савахтани?“ А тоа значи: „Боже Мој, Боже Мој, зошто си Ме оставил?“ Некои од оние, што стоеја таму, штом го чуја тоа, рекоа: „Ете, го вика Илија.“ А еден отрча, натопи сунѓер во оцет, па како го закачи на трска, Му даваше да пие, велејќи: „Почекајте да видиме, ќе дојде ли Илија да Го симне?“ Исус, пак, кога испушти висок глас, издивна. И црковната завеса се расцепи на две, одозгора додолу. А стотникот, што стоеше спроти Него, кога виде дека Он, откако извика така и издивна, рече: „Навистина Овој Човек бил Син Божји!“ Имаше и жени што гледаа оддалеку; меѓу нив беше и Марија Магдалина, и Марија, мајката на малиот Јаков и на Јосија, и Саломија, кои и тогаш, кога Он беше во Галилеја, врвеа по Него и Му служеа, и многу други што беа дошле со Него во Ерусалим.
На 20 февруати 2011 година, во Неделата на блудниот син, на празникот на свети Партениј, епископ Лампсакиски, и преподобен Лука Еладски, во храмот на Светото Благовештение, во кругот на Клиничкиот центар во Скопје, отец Душко Наумоски отслужи Божествена Литургија. На Литургијата верениот народ се причести со Светите Христови Тајни. На певницата псалтот Горан принесуваше молитви кон Бог.
Старец Паисиј Светогорец
За да не се заморуваш околу проблемот на послушанието и да не клоцаш, треба да влезеш во смислата на послушанието и да го почувствуваш како потреба, и тоа само тогаш ќе те ослободи, бидејќи послушанието не е ропство, туку слобода. Значи, кога ќе разбереш дека твојот старец ја носи одговорноста за тебе, дека тој се грижи за твоето спасение и дека што било да направи го прави за твое добро, а не да те измачува, тогаш ќе се радуваш кога ќе ти рече ‘не ова' или ‘не она' или, ‘оди таму' или ‘не оди таму' бидејќи сфаќаш дека сето тоа се случува за твое добро, за да те зачува од секое зло со опитот што го има од неговото лично искуство или од искуството на другите. Тогаш ќе се радуваш кога ќе го извршуваш послушанието или кога ќе прашуваш и ќе сакаш навистина, дури и во детаљи да не правиш ништо своеглаво за да не паѓаш во грешки. Но, од почит спрема својот старец, за да не го заморуваш со ситни работи, понекогаш, ќе го правиш она за што ќе те просветли Бог така што срцето ќе ти биде во послушание.
Преминпортал
Лето Господово 2011
