СВЕЧЕНО ПРОСЛАВЕН ПАТРОНИОТ ПРАЗНИК ВО АВОН, ОХАЈО.
 

Патрониот празник во МПЦ „Свети Климент Охридски“ од Авон, Охајо, беше свечено одбележен и прославен во сабота на 10 декември оваа година. Свеченостите започнаа со Света празнична вечерна богослужба во присуство на своите духовни чеда - членовите и парохијаните. Со светата богослужба која започна во 6 часот навечер началствуваше најстариот по чин протоереј-ставрофор отец Душко Георгиевски од Колумбос, Охајо, во сослужение на протоереј отец Зоран Здравев од Кентон, Охајо, парохискиот свештеник протоереј отец Васил Манасиев и ипоѓакон Ѓорѓи Ѓурчиновски од Колумбос, Охајо. На светата вечерна богослужба оваа година покрај членовите и парохијаните присуствуваа и молитвено учествуваа: Неговата Екселенција, Амбасадорот на Република Македонија во Вашингтон, САД, многупочитуваниот проф. д-р Зоран Јолевски со сопругата, Генералниот Конзул на Р. Македонија во Детроит, САД, господинот Игор Дукоски, Претседателот - сопственик на Европскиот Универзитет во Р. Македонија, проф. д-р Бојо Андрески со сопругата, Претседателот на црковната општина „Свети Никола“ од Грин, Охајо, г-дин Пеце Груевски, секретарот на катедралниот храм „Успение на Пресвета Богородица“ од Колумбос, Охајо, г-дин Боро Манев, г-дин Ристо Нечоски, бизнисмен од Детроит и многу други. По завршувањето на богослужбата парохискиот свештеник прочита пригодно слово - проповед за животот и дејноста на Свети Климент Охридски - Чудотворец, чувар, пазител и заштитник на Автокефалната Македонска Православна Црква - Охридска Архиепископија. Во меѓувреме пристигна архиерејскиот намесник за средно-западното американско архиерејско намесништво протоереј отец Синиша Ристовски, кој поради оправдани причини (парохиски обврски) не беше во можност да учествува на светата богослужба. Веднаш се пристапи кон благословување и режење на славскиот леб. Оваа година (2011) кумови/домаќини беа Божјите чеда Благој и Костадинка Скандеви, а за наредната година (2012) беа избрани чедата Божји Боро и Вера Маневи. Честито да им биде и од Бога благословено со многу успеси во понатамошниот земски живот на духовен и материјален план.

Откако завршивме со богослужбениот, молитвениот дел, духовно нахранети, свеченостите продолжија во големата црковна сала. Претседателот на црковната општина г-динот Павле Доковски ги поздрави присутните гости од главната маса и воедно им се заблагодари на сите што одвоија од своето слободно или работно време да присуствуваат и да земат активно учество во прославата на нашиот Патронен празник и им посака на сите топло македонско добредојде. Според програмата на црквата веднаш следуваа неколку претстави кои беа изведени од учениците на Неделното црковно училиште, а под водство на учителката Виолета која несебично, максимално и доброволно, од се срце ги учи децата да пишуваат и да читаат на својот мајчин македонски јазик.

По повод Патрониот празник - денот на црквата беше поканет и нашиот духовен татко, надлежниот епархиски архиереј, Митрополитот Американско-канадски господин Методиј, но поради службено отсуство од епархијата, го испрати архиерејскиот намесник протоереј отец Синиша Ристовски (кој исто така беше поканет од црквата), во негово име да ги поздрави сите присутни и да ни го честита Патрониот празник - денот на црквата. И така, од името на дедо Методиј и од негово лично име, архиерејскиот намесник се обрати до сите присутни пренесувајќи ги топлите и срдечни поздрави и заблагодарувајќи се на гостопримството на 02 октомври оваа година кога молитвено го прославивме големиот црковен македонски празник „Собор на сите македонски светии“ заедно со својот духовен татко митрополитот Методиј.

Според програмата следуваше обраѓање на Амбасадорот д-р Зоран Јолевски кој изворно се обрати до сите присутни и совршено појасни за најновите актуелни случувања во нашата Татковина, Р. Македонија. На крајот од своето обраќање се заблагодари за поканата и за гостопримството и посака многу сплотеност на сите македонци и македонки на духовен, национален, културен и просветен план, а посебно истакнувајќи ги како многу важни младите македонски генерации. Од страна на присутните говорот/обраќањето на Амбасадорот беше поздравен со голем аплауз. Потоа, женската секција пристапи кон сервирање на посната традиционална македонска вечера која беше благословена и пропратена со пријатна македонска музика. Прославата заврши во раните утрински часови во духот на неизмерната христијанска љубов и меѓусебна почит.