На 19 февруари 2012 г., во Неделата на Страшниот суд (Месопусна), кога Македонската Православна Црква ги празнува спомените на Св. Вукол, епископ Смирненски и Св. Фотиј, патријарх Цариградски; во храмот на св. Ѓорѓи Победоносец во населбата Чаир во Скопје се одслужи Света Литургија предводена од презвитер Ивица Тодоров. Верниот народ се причести со Светите Христови Тајни.
Во оваа последна подготвителна недела пред Великиот Пост, Светата Православна Црква нè поучува со евангелското четиво за Страшниот Суд (Матеј 25:31-46). Со радост го изчекуваме ветеното Второ доаѓање на Месијата во полнотата на Својата слава. Затоа да се подготвиме за вечен живот и да го чуеме „Дојдете, вие благословени од мојот Отец, наследете го царството кое ви е приготвено од почетокот на светот“.
А за да го заслужиме тоа треба да ја вршиме волјата Таткова – „зашто гладен бев и Ми дадовте да јадам, жеден бев и Ме напоивте, странец бев и Ме примивте, необлечен бев и Ме облековте, болен бев и Ме посетивте, во затвор бев и Ми дојдовте“.
Во светов денес за ова имаме многу шанси околу нас: жедни за убав збор, гладни за храна, осудени. Честопати лесно ќе кажеме – заслужил, не се помачил малку, е па крадел... Но како христијани да не заборавиме дека сето тоа се човечки судови, во светов царува злото, сите сме грешни („Ако тврдиме дека не грешиме, самите се лажеме и одбиваме да ја прифатиме вистината.“; 1. Јован 1:8).
Затоа, после неделата на Митарот и фарисејот и неделата на Блудниот син, да се ослободиме од гордоста и со послушание да ги прифатиме предочените поуки. Великиот Пост нека ни ги засили верата, надежта, и љубовта затоа што како христијани треба да постиме постојано согласно пропишаните правила на Црквата. Само така на сите околу нас навистина ќе им посведочиме дека животните страдања имат смисла.
За Преминпортал,
Ратислав Кардалев
