Грчката црква упати апел до народот:
за семејството, хомосексуалните и граѓански „бракови“
19 декември 2013
Грчката православна црква официјално се изјасни против новиот закон, кој им овозможува на паровите што не се во брак правно да го признаат своето „партнерство“. Аgionoros.ru со мали скратеници го објавува овој „апел до народот“, кој анализира проблеми какви што се кризата во семејните односи, хомосексуалните бракови и „слободниот соживот“.
Возљубени во Господа духовни деца на православната Црква!
Нашето општество е тешко болно, а неговата основна клетка - семејството, полека, но сигурно претрпува разорително влијание и се распаѓа. Не можеме да го занемариме фактот дека институцијата како што е семејството, во текот на сето свое постоење, е најсигурна социјална структура, која служи за правилно воспитување на младината. И токму семејството ги обликува детските души „во поглед на науката и поучувањето во Господа“, нивната подготовка за идни членови на општеството, како луѓе со различни професии, вклучително и раководители на различно ниво.
Денес институцијата семејство е подложена на тешки искушенија, секојдневно поднесува удари, кои често скриено ѝ се нанесуваат. Секое скршнување од здравиот семеен пат води кон разновидни, тешки последици... Денес сите зборуваат само за правата на човекот, но забораваат на неговите обврски. Дури и самиот поим за полот се смета за непостојана категорија, која може да биде подложена на промени. Денес луѓето постепено ја губат способноста да ја видат светоста во соединувањето на двата пола.
За нашата православна Црква, бракот не се состои само во заедничкото движење кон обожувањето и преобразувањето на светот Божји. По пат на раѓање и воспитување на деца бракот гарантира не само продолжување на човечкиот род. Со помош на семејството човекот му станува со - творец на Бога и ја добива најголемата од сите видови на одговорност - одговорноста пред своите потомци.
Секое семејство имас свет, единствен и неповторлив карактер, бидејќи претставува слика на тајната која се наоѓа во основата на Христовата Црква. А тоа, пак, значи дека никој нема право да го понижува семејството или да подметнува било што друго освен него.
„Алтернативните облици на семејство“ кои настануваат во современите реалии, само го докажуваат фактот на посветовување и дехристијанизација на современите западни општества и народи, кои притоа, имаат богато христијанско минато. денес е од животна важност потребата и понатаму да се сочува и обезбеди светата институција брак, која со право се нарекува „мала црква“.
Животот во духот на материјализмот и нихилизмот, осиромашувањето на моралот на вистинската љубов, новата ситуација во финансиската сфера и на работниот пазар, како и промената на улогите, во комбинација со другите фактори, доведоа до извртување и намалување на институцијата семејство. Изгледа дека за многу наши сограѓани, е ослабнат таинствениот карактер на семејството и неговата врска со Црквата, или, дури, воопшто и не постојат. Во овие услови се појавија такви облици на организирање на семејниот живот, кои во светлоста на христијанското учење треба да се набљудуваат како отстапувања, а според современите световни претстави тоа се алтернативни облици на семејство. Тоа се невенчаните бракови, непотполните семејства, слободниот соживот и таканаречениот хомосексуален брак.
Црквата која ја претставуваат клирот и мирјаните – стручни лица од различни области, ги проучува овие појави од богословска гледна точка, го формулира своето сведоштво, а исто така создава и пастирски пристап кон сите нови, алтернативни шеми за уредување на современиот приватен живот, во споредба со традиционалното семејство. Во случај државата да го озакони слободниот соживот, ќе имаме работа со длабоки богословски и социјални извртувања на поимот семејство, кој веќе не се набљудува како „мала црква“, туку како обичен заеднички живот. Црковниот чин на венчавање на почетокот на бракот во очите на многу современи луѓе претставува некакво бесмислено дејство, а на крај и своевиден фолклорен обред.
Денес многу е зголемен бројот на разводите, а тоа покажува дека луѓето денес станаа поповршни, дека нивните чувства не се одликуваат со длабочина, во споредба со чувствата на нивните претци. И тие биле несовршени, но нивните бракови траеле цел живот. Денес на луѓето им е сѐ потешко да се одлучат за склопување на брак и создавање на семејство, и притоа не се виновни објективните тешкотии, како што се економската криза и невработеноста, туку други, во суштина, второстепени причини.
Во услови на современа општествена криза потребно е семејството повторно да се воцркови и поврзе со евхаристиското искуство на Црквата.
Треба духовно да се подготват младите парови за нивниот пат кон бракот и постојано да се поддржуваат во создавањето на нивната „мала црква“, за да не би се почувствувале дека со своите проблеми се препуштени на самите себе.
Задачата и мисијата на Црквата се состои во тоа јавно, смело и насекаде во светот да сведочи: за смислата на животот во Христа, за надминување на трулежноста и смртта, за силата на Христовата вера. Како и во тоа на сите можни начини да се поддржи и заштити семејството.
Вистинскиот проблем на семејството денес не е само во раскинување на односите, кавгите или суровоста на едниот брачен другар кон другиот, туку многу повеќе во тоа дека семејството е подигнато на ниво на материјалистички идол, бракот веќе не се смета за пат кон Царството Божјо и не е ориентиран кон него. Разводите не сведочат за презирање на семејството, туку за одбивање за носење на крстот на семејниот живот.
Во Грчката црква постои специјална комисија за прашањата околу бракот, семејството, заштитата на детството и демографијата, како и специјална синодална комисија за прашањето во врска со. Важна е и програмата на Светиот Синод за финансиска помош на повеќедетните семејства, кој веќе е испробан во Тракија.
Со учество на клирот и мирјаните на Грчката црква, создадени се нови структури за подготовка на родителите и овозможување на консултативна помош околу воспитувањето на децата: курсеви за подготовка за Тајната брак, школи за родителите, центри за давање на консултативна помош и поддршка на семејството. се издаваат специјални книги, се емитуваат радио и телевизиски емисии посветени на семејството и бракот, се одржуваат младински средби на соодветни теми.
Црквата, барајќи ги ближните и оддалечените, не пропушта ниту една прилика за општење со семејствата, тежнеејќи кон тоа да им даде значајна и конструктивна помош, да биде заедно со своите духовни деца, и во радостите и во искушенијата.
Во сегашните услови на посветовеност која се одвива со голема брзина, Црквата продолжува да им ја открива на верниците, како и на оние кои сакаат да живеат вон нејзините рамки, длабоката смисла и значење на христијанското семејство, обидувајќи се на луѓето повторно да им донесе радосна вест, во време на незадржлив нихилизам и губење на секоја смисла за насоченост кон вредностите. Денес смислата на постоењето на институцијата семјство се состои токму во тоа, да се обнови и повторно стекне смислата на христијанската вера и односите меѓу личностите.
Извор: Православие.ру
Преземено од: Бигорски манстир
Друго:
Митрополит Етолијски Козма позвао је грчки народ на исповедништво за Христа
